Muséu rexonal que tien el finxu de caltener la memoria del puelu asturianu. Fundáu en 1969 pol Ayuntamientu de Xixón, acueye bones coleiciones de materiales etnográficos, instrumentos musicales tradicionales, semeyes antigües, testimonios de memoria oral y música tradicional, artes gráfiques y documentos escritos personales, de comercios y d’industries rurales..

Ta fincáu nun terrén axardináu de 32.000 m2 onde se llevanten dellos edificios qu’agospien esposiciones temporales y permanentes: la casa de los Valdés, del sieglu XVII, dedicada a esposiciones fotográfiques; la casa de los González de la Vega, de 1757, qu’acueye’l Muséu de la Gaita, con una esposición permanente de gaites d’Europa y África y d’instrumentos musicales d’Asturies; el Pabellón d’Asturies de la Expo92 y tres tendayos, el primeru con preseos y carros preindustriales, el segundu con aperios, máquines y carros industriales, y l’ultimu con apareyos de caballería y útiles p’acarretar persones.

Nel recintu del muséu hai tamién una casa terrena qu’enraza con un modelu representativu del centru d’Asturies y con moblame propiu d’una vivienda de la segunda mitá del sieglu XIX; un pisón o molín de mano pa desergar; un llagar con delles prenses de sidra, amás de los aperios pa facerla y bebela, y tres horros y dos paneres de los sieglos XVIII y XIX, dalgunu orniáu con talles bien aparentes. Pa finar, tamién tien una bolera pa la modalidá de cuatriada y una güeria salada, única buelga del paisax de marisma qu’había mayormente nesta fastera de Xixón. El muséu tien una biblioteca y acueye el Archivo de la Tradición Oral y l’Archivu de la Música Tradicional Asturiana.