El muséu ta afincáu en Ferreirela de Baxo (Santalla d’Ozcos) na casa au nació Antonio Raimundo Ibáñez, marqués de Sargadelos (1749–1809). Ta dedicáu a la vida y la obra d’esti comerciante, industrial ya ilustráu, qu’a lo cabero del sieglu XVIII llevantó en Sargadelos (Cervo, Lugo) una de les primeres fábriques de fundición de fierro colao y loza d’España. La esposición suliña la venceya d’esti personax cola tierra na que nació, onde anició dende cuantayá una importante industria de fierro forxao, y tien l’envís d’esmolecer la xente pol caltenimientu del patrimoniu cultural de so.

La casa mandóla Ricardo Duque de Estrada y Tejada, conde de la Vega del Sella y descendiente del marqués. El muséu abrió en 2001 y depende del Ayuntamientu de Santalla d’Ozcos.

L’edificiu ye una casa vieya de dos andares remocicada en 1774. Nel andar d’arriba recréense dellos ambientes propios de la vivienda de la zona: el patiu, dedicáu a bien d’usos (la matanza, preseos, etc.); la lareira, espaciu principal de la casa col fornu, los escaños y la cacía; el cuarto de fora, cuartu de dormir con dellos muebles; el cuarto grande o sala, emplegáu pa echase o pa xintar nos festeyos; el cuarto pequeno, per onde s’entra pa la planta d’abaxu. Dellos paneles allugaos peles sales tienen información sobre la casa y la so alredorada, una biografía d’Ibáñez y una copia del retratu que-y pintó Francisco de Goya ente 1805 y 1808.

Nel andar d’abaxu hai una estancia dedicada a la industria testil, estaya na qu’Ibáñez tuvo negocios: importaba llinu del Bálticu, repartíalo peles cases del conceyu y al cabu recoyía’l productu peracabáu. Otra sala amuesa una escoyeta d’oxetos producíos nes Reales Fábricas de Sargadelos, mayormente loces de toles dómines (platos, fontes, taces…).

El conxuntu complétase cola forxa y la bodega, dambes asitiaes na corrada.

En Mazonovo, a 2 km de Ferreirela de Baxo, pue visitase un martinete hidráulicu pa machucar y estirar les barres de fierro que salíen de les ferreríes. Esi mazu inda conserva’l banzáu, fechu de madera.