El Museo Etnográfico Juan Pérez Villamil, asitiáu na villa marinera de Veiga, nel conceyu de Navia, inaguróse en setiembre de 2001. Creóse pol aciu de l’Asociación Cultural Amigos de la Historia, con mires d’agasayar a la familia mariñana y d’aldea, ensin escaecer a los indianos.

Ye una recreación percuriada de lo que foron los estilos de vida tradicional de los puelos de l’alredorada, cola presencia de la casa tradicional, los oficios artesanales y el valir que tevo pa Veiga y otres villes mariñanes la industria conservera del pescáu. Anguaño’l muséu ta xestionáu pola Fundación Amigos de la Historia. El muséu allúgase nel ala oriental de la vieya fábrica de conserves La Arenesca, edificiu llevantáu nos entamos del sieglu XX. Éntrase per un patiu semicubiertu onde s’amuesen delles máquines de la fábrica antigua (caldera, caciples, prenses pa enlatar, etc.), amás d’una partida d’azulexos d’esta industria en Veiga y un barcu de madera.

Yá dientro, el muséu distribúyese en planta baxa y sobráu, cuntando amás con otros dos cuartos que tan al empar: l’archivu y la sala xuntes. Na planta baxa puen visitase: la recreación de la casa tradicional, col char y el cuartu; los preseos d’aldeanos y mariñanes, amás de los propios d’ocho oficios tradicionales venceyaos col mundu rural (filandeira, redeira, ferreiro, madreñeiro, cesteiro, zapateiro, canteiro-pedreiro y ebanista); una perbona coleición de carpintería de ribera y dos escudos fidalgos d’antaño. Nel sobráu, amás del homenax a la emigración y al ociu, atopamos una alegoría de la marina mercante colos preseos de so, amás d’una coleición de maquetes rellacionaes col mundu físicu y espiritual del mariñán, y una escoyeta bayurosa de zooloxía marina de la costa cantábrica.

Veiga allúgase na rasa costera occidental, na pequeña ensenada qu’hai na bocana del ríu del mesmu nome. Al oriente del llugar atopamos la Reserva Natural Parcial de Barayo, formada na playa d’esi mesmu nome y constituyida por un importante sistema de dunes y cañaverales.