Asitiáu na villa de Nava, a 30 km d’Uviéu, tien l’oxetivu d’espublizar y promocionar esta bebida d’Asturies. La esposición xébrase de la idea museística tradicional, que ve’l muséu como una escoyeta de pieces ordenaes según los criterios temáticos o tipolóxicos. El muséu tien como retu principal que’l visitante participe activamente. Asina, pel aciu d’un sistema espositivu envolvente, mira de tresmitir tola información posible no tocántenes a la fechura, el consumu y la historia de la sidra.

La visita organízase según el ciclu añal de la sidra, de primavera a primavera, dende la polinización hasta’l consumu.

Nun primer apartáu, usando como xida un truébanu en plena actividá, desplícase’l procesu de polinización, analícense les clases de mazana usaes pa facer sidra y recréase cómo s’escueye la maza.

Un segundu apartáu enseña los trabayos necesarios pa sacar el zusmiu. Como filu conductor, el visitante usa un aparatu que reproduz, con una sola mazana, los pasos y el procesu del trabayu añal d’un llagar.na pa saca-y el zusmiu.

Al tratase d’un muséu qu’espeya una actividá qu’anguaño ta alicando, hai bona manera de reconstruyir los ambientes venceyaos cola sidra, como ye’l casu’l llagar o bodega y el chigre.

Los xuegos tradicionales y el folclor tán pervenceyaos col consumu de sidra. Una bolera virtual y una gaita MIDI son les referencies que s’usen pa recrear la plasticidá y los ritmos ancestrales.

El muséu tamién acueye elementos gráficos y documentales del sieglu XX venceyaos cola sidra, ente los que rescampla una coleición d’etiquetes de sidra axampanao.