L’Ayuntamientu de Casu inaguró’l Museo de la Madera n’avientu de 2001. Tien la so sede en Veneros, nuna casona del sieglu XVI. El muséu presenta una esposición temática na qu’amuesa’l valir de la madera na sociedá tradicional asturiana, con especial enfotu nel calzáu fechu con esta materia prima: la madreña.

L’edificiu tien dos andares y un baxu cubierta p’almacén y pa servicios internos del muséu. La visita entama nel andar d’abaxu con una sala dedicada a la viesca y a les ferramientes. Nella vense les clases de madera usaes polos aldeanos asturianos pa facer preseos, coses pa en casa, construcción d’edificios, etc., asina como les ferramientes pa baltar y trabayar la madera. La esposición complétase con un audiovisual que val d’introducción a tol muséu.

Esposición de madreñes nel muséu de Veneros.Nel andar d’arriba hai una esposición sobre’l calzáu de madera onde s’enseñen exemplares procedentes de delles tierres d’Europa, norte de la península ibérica y, sobre too, Asturies y el conceyu de Casu; esta coleición mandóla al muséu Alfonso Fernández Canteli. La esposición tamién amuesa les ferramientes usaes pol madreñeru y l’emplegu de les madreñes mesmes.

La visita al muséu peracaba con un percorríu pel puelu de Veneros o­nde puen vese los usos que se-y da a la madera, como la construcción d’edificios (horros) o la fabricación de preseos (llabiegos, angazos, truébanos, etc.).

En Pendones, a 9 km de Veneros, alcuéntrase’l Taller del Madreñeru, fincáu sobre un llavaderu antiguu. Equí pue vese’l trabayu del madreñeru casín Luis Testón, mayormente la fechura d’esti calzáu y les ferramientes necesaries.

El Museo de la Madera ta nel Parque Natural de Redes, qu’abarca los conceyos de Casu y Sobrescobiu, y foi declaráu Reserva de la Biosfera en 2001. El parque, asitiáu na fastera centrooriental del cordal Cantábricu y percorríu pel Nalón, tien bones viesques de faya y carbayu.