El muséu amuesa la cultura tradicional de dellos conceyos asitiaos nel centru d’Asturies. Creáu en 1982 pol Ayuntamientu de Grau, dende 1995 la so esposición permanente ta allugada nuna nave industrial de La Cardosa, a unos 500 m del centru la villa de Grau. Tien amás, na casa la cultura de Grau (Palaciu Miranda Valdecarzana), unes sales pa esposiciones temporales y una muestra de la fechura la sidra na que rescampla un llagarón de pesa pa prensar la magaya.

La esposión permanente ta organizada en dellos espacios que permiten conocer la vida tradicional asturiana:

La cultura del pan. Ponse especial procuru nel cultivu la escanda, el cereal más afayadizu pa facer pan en munchos conceyos asturianos hasta’l sieglu XX. Espónense les mesories pa collechar, un pisón de rabil pa separtar el granu de la poxa y un molín de regueru pa la farina.

La casa. Nella recréase la cocina, el ñuedu de la vida na aldea, con tolos sos elementos: les calamiyeres, o­nde se colgaba’l pote; los escaños, o­nde se comía; el fornu, o­nde se cocíen el pan y la boroña; el bogadoiro con arna pa la colada; la masera p’amasar el pan y la cacía. Tamién hai una sala y un cuartu, amás d’un un telar y dellos preseos pa filar llana y llinu (cardes, restiellos, ruecas, fusos, argadiel.las, etc.).

Ferramientes usaes pa llabor agrícola y ganaderu, tanto nes vegues como nel monte.

Los oficios tradicionales, con una fragua o­nde’l ferreru fabricaba ya iguaba preseos de fierro; el bancu de goxeru, o­nde l’artesanu facía les banielles d’ablanu pa les goxes, etc.; el bancu y el tornu de carpinteru, o­nde se trabayaba la madera; ún de los bancos del madreñeru o­nde s’afuracaba esti calzáu; el bancu del zapateru; la rueda d’afilar cuchiellos y les muestres de cerámica bizcochao del taller de Miranda (Avilés).